加密貨幣(Cryptocurrency)自年初起雞犬升天，升十幾倍甚至百幾倍也有，今個星期開始有點燶味，現在才寫加密貨幣是否有點過時呢？很多年前Bitcoin還是幾蚊時，我早已拜讀Satoshi Nakamoto那篇原始論文，當年冇買就有早知冇乞兒。Ethereum初出時，我完全睇唔明佢有乜用，於是又係冇買。2018年加密貨幣第一次炒爆，除了在一旁吃花生看戲，NVDA順帶升了不少外，基本上完全不關我事。當年以為就此加密貨幣就此玩完，估不到2021年迎來第二春。
我對Bitcoin是數碼黃金的理念是十分認同的，當聯儲局瘋狂印銀紙，在金價去年八月升破2011年高位後，我見BTC有力重試破頂，便趣趣地買了少少玩下，買得輸晒也不肉痛雞碎咁多，早知瞓身買就發咗達。BTC作為金錢儲存價值的功能，在數量有限不似法幣無限狂印，簡單的供求關係就會升值。最重要是傳統金融體系開始承認BTC的地位，有期貨有ETF連Robinhood都可以買，終於從minor league升上major league。
雖然BTC供應有限，但加密貨幣供應無限，新幣ICO來分一杯羹，理論上沒有實際用途的其他幣，價值應該是零。當DOGE同SHIB這些擺明開玩笑的垃圾幣都可以炒得起，在見識過GME炒到過五百蚊後，又不覺得有什麼奇怪，市場上任何事情也可以發生。加密貨幣作為價值儲存，基本上就是玩接火棒遊戲，希望明天有人會出更高價接貨。黃金同BTC的原理也相同，不過就是玩得夠耐，社會上有錢有權為其背書，大家就會繼續玩下去。
加密貨幣作為交易媒价，我看不出block chain比起傳統的電子支付，不論是能源效率、速度或保安上有什麼優勢。Block chain只不過是個public database，你會不會關心你間銀行用什麼database統系？所以LTC同ADA這些純萃投資幣，validation係比BTC更有能源效率，但係講能源效率一定及不上傳統金融體系。我是不明白為什麼長遠會有價值，價值儲存是一個winner take all的遊戲。至於ADA講到自己撈埋ETH果瓢做smart contract，十劃都未有一撇。講開ADA，原來Cardano係香港公司，都唔知信唔信得過。Proof-of-work係好浪費能源，但係proof-of-stake嚴格上唔係decentralize，連crypto信唔過傳統金融系統的最大賣點也失去。
ETH是smart contract的layer 1 chain，早幾年睇唔明嘅野，唔知點解現在又睇得明，睇完ERC-20，ERC-721，睇埋ETH2.0轉上去PoS的proposal。作為基礎infrastructure，ETH非常有價值，ETH幣本身用來付油錢。但係現ETH價太高，同作為service要平靚正的要求相違背，如果不解決油錢太貴的問題，遲早會有更便宜的代替品。所以ETH幣大升，含有一個內在盾矛，希望ETH2.0可以解決這個問題。
Binance幣安是全球最大crypto exchange，自己出了隻BNB幣，可以用來付交易費用，但係主要功用係Binance嘅dividend，每季Binance都會以利潤20%回購消毀BNB，減少供應幣價升值。買BND其實同買COIN股票差不多，都係睇下你信唔信得過間公司的前景。不過我總是懷疑Binance背後是紅色資本，它原本是中國公司，前後搬了好幾次總部避法規，現在落腳歐洲小國稅務天堂馬爾他。很難預測Binance的未來，早兩年被人hack盜幣冇事，抄ETH整山寨smart contract又有人落搭，現在比美國IRS查洗黑錢，可能罰少少錢又冇事呢。畢竟全球最大兩間加密貨幣交易所，Binance同火幣都係中國公司，有中國共產黨在背後撐腰，身負取代美元國際儲備地位的神聖任務。如果西方沒落中國崛起，Binance取代SWIFT都有可能。
一個Tether幣對一美元，永遠不會升值。長揸只有風險沒有回報，因為謠傳Tether沒有足夠的美元儲備也有一段時間，一擠提就爆煲血本無歸。一般散戶不會把錢長泊在Tether，只是炒出炒入或轉美元的中間站。Tether可以放入liquidity彩池收利息，最高有12%利息，即係放unsecure loan，完全講開信字，相信佢會還錢，唔會走佬走數。玩得crypto嘅人，預了大上大落，會甘心只有12%的回報嗎？所以我又唔係好明個value proposition。
XRP原本打算做crypto版的Western Union做外匯生意，現在母公司Ripple比SEC告緊周身蟻，擺明要挑戰SWIFT的江湖地位，SWIFT仍美國的金融武器獨市生意，關乎國家安全怎可能放過Ripple。再現XRP嘅不decentralize亦不流通，貨源歸邊在Ripple手上，炒起咗都只會pump and dumb益莊家。
UNI我反而有點興趣，UNI幣本身完全沒有價值，只有投票Uniswap Protocol的用途，等於Uniswap的股票。Uniswap是ETH創辨人Vitalik Buterin全力推動的decentralized exchange，有可能與Binance或Coinbase那些傳統交易所爭一日之雄。對於Automated Market Maker我介乎看懂與不懂之間，也許這個DeFi金融實驗最終會失敗，但有著完全的顛覆現有制度的可能性，同當年第一次看Bitcoin份white paper的震憾。MKR係DAI嘅governace coin，如果DAI取代USDT成為default stable coin，MKR有可能水脹船高。
我好老實講我睇唔明Polkadot同Internet Computer係乜。感覺上兩者的用途有些相似，但Polkadot就好technical好深，但ICP就連過名都好似明昆人咁。睇唔明嘅野，都係暫時唔好掂。最後那些山寨幣，BCH，ETC，SUSHI，CAKE等等，我認為都係唔好掂。山寨幣走了入進化的死胡同，長遠是死路一條。加密貨幣的本質不是條chain，其本質是個protocol，誰主宰protocl主宰一切，可以把你的賬戶歸零也可以。現在加密貨幣還是新生期，protocol必需要演化得很快，去修正問題和增加功能來搶佔市場。
我不是crypto expert，萃純睇完網上資料，想到什麼便寫下來。幾年後重看我今天的預測，看看估錯多少應該會好好笑。
